VOV4.Jarai - Tŭ ư hăng tơlơi jak iâu mơng Khua dêh čar New Zealand, yă Jacinda Ardern, mơmŏt tom brơi lơ 16/7, Khua mir sir dêh čar ơi Nguyễn Xuân Phúc nao jơnum ƀu sit nik khua mua gah bưwih ƀong huă jơnum bơkơtuai bơwih ƀong huă kual Asia - Thái Bình Dương (APEC) kơ bruă pơgang klin Covid-19 hăng hơhrŭ glăi bơwih ƀong huă. Hăng anăn pơphun “Pơgang klin Covid-19, anai lĕ hrơi blan kiăng kual Asia - Thái Bình Dương ngă hrŏm găn rơgao tơnap tap amăng bruă ia jrao, pơtrut tañ brua hơkrŭ glăi bơwih ƀong huă, ngă akŏ phun kiăng ba glăi tơlơi hơdip hiam klă pơgikơdih”, Jơnum đing nao pơčrông sai hơdôm hơdră kiăng găn rơgao tơnap tap gah bruă ia jrao hăng pơtrut hơkrŭ glăi bơwih ƀong huă amăng kual Asia - Thái Bình Dương.

Đĭ pơhiăp amăng mông jơnum, Khua mir sir dêh čar ơi Nguyễn Xuân Phúc brơi thâo anai lĕ hrơi mông kiăng găn rơgao tơlơi lông, gum pơgôp pơsir hĭ tơnap tap hăng hơđong tơlơi hơdip kơ mơnuih ƀon sang, ba tơlơi bơwih ƀong huă rŏng lŏn tơnah hơkrŭ glăi, anăp nao hơdră pơđĭ kyar hơđong, pok prong.

Siu Đoan: Pơblang