VOV4.Jarai - Lơ 28/12, ƀơi Đà Nẵng, Khua mir sir dêh čar ơi Nguyễn Xuân Phúc nao pơhmư̆ mông Bơkơtuai Ƀôn prong Đà Nẵng: Bôh than hăng tơlơi čang rơmang. Tui hăng tơlơi lăi pơthâo glăi mơng ƀôn prong, mơng hrơi jing ƀôn prong thun 1997 truh ră anai, Đà Nẵng jing laih pô ba jơlan hlâo tơlơi bơwih ƀong kual Tŏng krah dêh čar. Hơdôm bôh than dưi ngă tơdơi kơ 25 thun rơgao lĕ yak pơplih pô kơtang, tơlơi bơwih ƀong đĭ kyar na nao. Lom akă bưp tơnap yua kơ klin ba truh, thun 2019, hơdră bơwih ƀong mơng Đà Nẵng hmâo giăm truh 69.500 klai prăk, pơhrui hơnong ñu rim akô̆ mơnuih rơbêh kơ 97 klăk prăk sa thun. Khă dô̆ tơnap yua kơ klin Covid-19, thun anai, hơdră bơwih ƀong mơng ƀôn prong hmâo giăm truh 64 rơbâo klai prăk. Ƀôn prong ăt hmâo laih mơn tơlơi pơplih kơtang kiăng pơđĭ kyar. Pơhiăp amăng mông bơkơtuai, Khua mir sir dêh čar ta pơtă Đà Nẵng ƀu dưi lăng djơ̆ pran mơ̆ khom đing nao prong kơ pơđĭ kyar ngăn rơnoh ană mơnuih kiăng djru kơ bruă pơđĭ kyar. Đà Nẵng khom pơđĭ kyar jing anih anom phun bruă sĭ mơdrô jar kơmar; anih anom nao ngă pơhư̆č pran jua mơng ƀing tuh pơplai, tuai hyu čuă ngui; jing sa pran pơtrut, ba jơlan phun ƀu djơ̆ kơnong kơ rơnoh pơđĭ kyar bơwih ƀong mơng đơ đam dêh čar ôh mơ̆ ñu dô̆ jing sa gru pơhmu nao hăng tơlơi ư-ang kơ tơlơi hrưn đĭ yak rơgao tơlơi tơnap, tơlơi gun, rŭ tơgŭ truh kih mơng Việt Nam dong./.

Siu H’ Prăk: Pơblang