VOV4.Jarai -  Hmư̆ tui tơlơi jak iâu mơng Khua mir sir dêh čar Kenya, Khua mir sir pơplih bruă apăn Khul pơgang rơnuk rơnua Sang gum hơbit djop dêh čar blan 10/2021, mơmot lơ 28/10, Khua mir sir dêh čar ơi Nguyễn Xuân Phúc nao pơhmư̆ hăng pơhiăp amăng mông Bơkơtuai pok prong Gưl dlông lăng nao rai mơng ataih kơ Gum hrom kơplah Sang gum hơbit djop dêh čar hăng Khul pơlir hơbit kual Ơi Jŭ hăng anăn ñu “Kơtưn gum hrom hơbit yua kơ tơlơi rơnuk rơnua hăng hơđong amăng sa anih anom rung răng glăk pơplih”. Bruă Khua mir sir dêh čar ơi Nguyễn Xuân Phúc nao pơhmư̆ mông bơkơtuai pơsit bruă mă, tơlơi gum hơgôp bruă gơgrong mơng Việt Nam amăng kơtưn gum hrom kơplah Sang gum hơbit djop dêh čar hăng hơdôm khul grŭp amăng kual, hrom hăng anun tô nao rai dong bôh than dưi ngă amăng blan Việt Nam ngă Khua Khul pơgang rơnuk rơnua Sang gum hơbit djop dêh čar (blan 4/2021). Amăng mông bơkơtuai, Khua mir sir dêh čar ta pơsit kơ hơdôm bôh than dưi ngă, tơlơi gir run pơđĭ kyar hăng mut hrom jar kơmar mơng kual Ơi Jŭ hơdôm hrơi rơgao, hrom hăng anun lăi pơthâo tơlơi tơnap, tơlơi lông gah rơnuk rơnua mơng hlâo, akă hmâo mơng hlâo mơ̆ kual Ơi Jŭ ră anai glăk bŏng glăi, biă ñu hơdôm anô̆ bơdjơ̆ nao ƀu klă mơng tơlơi rung răng, ƀu hơđong, klin Covid-19./.

Siu H’ Prăk: Pô pơblang