VOV4.Jarai - Amăng hrơi ruah khua lơ 23/5, Khua mir sir dêh čar ơi Nguyễn Xuân Phúc amra plĕ hră ƀơi tơring glông Củ Chi, ƀôn prong Hồ Chí Minh. Anai lĕ tơlơi pơhing dưi hmâo khua pơ ala Jơnum min ruah khua tơring glông Củ Chi ba tơbiă amăng mông jơnum tal 13 mơng Jơnum min ruah khua ƀôn prong Hồ Chí Minh pơphun čơtlăm lơ 18/5. Tui hăng Jơnum min ruah khua tơring glông Củ Chi, amăng lơ 23/5, anih anom mơ̆ Khua mir sir dêh čar ta plĕ hră ƀơi kual mrô 7, tơring kual Củ Chi, tơring glông Củ Chi. Hơdôm khul kông ang, ling tơhan dưi pơpha nao pơgang rơđah rơđông ƀơi anih mơ̆ Khua mir sir dêh čar ta plĕ hră. Hăng bruă plĕ hră ƀơi Sang ia jrao pơdong mă yua lom kiăng Củ Chi, tơring glông amra ba kơthung plĕ hră nao, pơhrua nao rim grŭp plĕ hră 2 čô nai ia jrao, ơi ia jrao dô̆ amăng lăm kiăng pel ĕp hră plĕ. Mơnuih ruah khua amra dưi pơpha brơi gai čih, gai gat yua sa wot. Ƀơi ƀôn prong Hồ Chí Minh, Khua mir sir dêh čar ơi Nguyễn Xuân Phúc lĕ mơnuih tơbiă anăn kơ Khua pơ ala mơnuih bôn sang dêh čar ta tal 15 anom mrô 10 (tơring glông Củ Chi hăng tơring glông Hóc Môn)./.

Siu H’ Prăk: Pô pơblang