VOV4.Jarai - Tŏ tui tal nao čuă gưl kơnuk kơna dêh čar Kur, mơguah tom brơi lơ 22/12, Khua mir sir ơi Nguyễn Xuân Phúc hơmâo nao čuă jơmư, tơña bla, pơhiăp tom ƀing khua, mơnuih apăn bruă Sang anih jưh Việt Nam ƀơi dêh čar Kur, bưp ƀing pơ ala kơ mơnuih ƀon sang Việt Nam ƀơi dêh čar Kur. Hok mơ-ak yua hơmâo bưp glăi neh met wa, Khua mir sir ơi Nguyễn Xuân Phúc lăi glăi amăng hrơi mông tơnap tap yua klin Covid-19 ngă, Việt Nam hăng Kur hơmâo lu bruă gum djru nao rai. Anai lĕ pran juă kiăng khăp kiăng hơdor lui, pơtrut tui dong tơlơi ngă giăng mah sui thun kơplah wah dua boh lŏn ia hăng mơnuih ƀon sang.

Amăng hrơi blan pơ anăp, Khua mir sir ơi Nguyễn Xuân Phúc kiăng ƀing khua, mơnuih apăn bruă Sang anih jưh ngă tui klă hloh bruă jao mơng Ping gah, Kơnuk kơna, ngă klă bruă pơgang ba mơnuih ƀon sang, djru ba neh met wa Việt nam kiăng jai hrơi hơmâo lu tui bruă ngă sit nik mơng neh met wa pioh pran jua kơ lŏn ia ta, gum pơgôp akŏ pơjing plơi pla, lŏn ia, amăng anun hơmâo bruă pơsir brơi hră pơ-ar djơ̆ tơlơi phiăn kơ mơnuih Việt Nam dŏ ƀơi dêh čar Kur.

Siu H’Mai: Pơblang