VOV4.Jarai - Tŭ ư hăng tơlơi jak iâu mơng Khua git gai Ping gah, Khua mir sir Lao ơi Thongloun Sisoulith, Khua mir sir dêh čar ta ơi Nguyễn Xuân Phúc hrŏm hăng bơnai ñu ba jơlan grup hyu mă bruă mơng dêh čar Việt Nam nao čuă sit nik pơ dêh čar Lao dong mơng lơ 9 truh lơ 10 blan 8/2021. Lơ 9/8, ƀơi Ƀirô mă bruă, Khua git gai Ping gah, Khua mir sir Lao ơi Thongloun Sisoulith hăng bơnai ñu hơmâo git gai mông čơkă Khua mir sir ơi Nguyễn Xuân Phúc hăng bơnai ñu hăng hơdră čơkă khua mua pơprong. Amăng mông jơnum sit nik, dua čô khua pơdah pran hok mơ-ak hăng hơdôm bruă pơđĭ kyar hiam klă amăng tơlơi rô nao rai kơplah wah dua boh dêh čar amăng hrơi blan laih rơgao hăng pioh lu mông pơlăi nao rai kơ hơdră djru kiăng pơgang klin Covid-19 glăk ngă tơnap tap amăng dua boh dêh čar laih dong tơlơi rô nao rai ngă hrŏm kơplah wai Việt Nam - Lao; hăng tŭ ư hrŏm pơtrut tơlơi rô nao rai ngă hrŏm amăng djop mơta bruă mơng kơđi čar, pơtom hiăp, ling tơhan truh pơtô hrăm, bơwih ƀong huă, sĭ mơdrô, tuh pơ alin, apui lơtrik, gru grua, boh thâo măi mok.. kiăng gum hrŏm găn rơgao tơnap tap, tŭ mă klă hơdôm tơlơi gal amăng rơnuk pơđĭ kyar boh thâo măi mok 4.0 ba glăi.

Siu Đoan: Pơblang