VOV4.Jarai - Tlam lơ 27/12, Grup khua pơ ala mơnuih ƀon sang ƀon prong Hồ Chí Minh ngă bruă hăng Jơnum min mơnuih ƀon sang ƀon prong krăp lăng bruă ngă tui tơlơi pơtrun, tơlơi phiăn dưm dăp bruă mă ƀơi ƀon prong Hồ Chí Minh. Khua mir sir ơi Nguyễn Xuân Phúc nao pơhmư̆ ƀơi Sang bruă Khua mir sir. Pơhiăp ƀơi mông jơnum, Khua mir sir ơi Nguyễn Xuân Phúc lăi rơđah, hăng plơi prong prong tui hăng ƀnon prong Hồ Chí Minh lĕ bruă dưm dăp čuk pơkra anih anom khŏm nao hlâo sa hơyak, khŏm lăng nao pơ anăp, ngă atur đah mơng pok pơhai akŏ bruă, iâu pơthưr kơnuk kơna hăng anom bơwih ƀong mơnuih ƀon sang ngă pô djru, pơsit tơlơi gơñăm nao, tơlơi kiăng ngă rơđah rơđông. Khua mir sir ăt tơpă ară črâo rơđah, ƀon prong Hồ Chí Minh glăk kơdun glăi ataih biă pơhmu hăng hơdôm boh ƀon prong amăng kual kơ bruă pơđĭ kyar bơwih ƀong huă, tơlơi dưi bơkơtưn, tơlơi hơdip mơda. Pran jua nao hlâo hăng tơlơi hmư̆ hing mơng ƀon prong pơhmu hăng dêh čar tơdu laih. Khua mir sir ơi Nguyễn Xuân Phúc kiăng ƀon prong kiăo tui tơlơi gơñăm nao, hơdôm tơlơi gêh gal đah mơng dưi pơkra giong hơdră ngă bruă, laih dong kiăng lăng bruă dưm dăp prăp rơmet bruă mă yơh tơlơi phun dưi pơdĭ kyar ƀon prong hơđong, kơjăp hăng rơđah rơđông.

Siu H’Mai: Pơblang