VOV4.Jarai - Ƀrô tal hơdor glăi 60 thun hrơi gru grua Sang hră pơtô tơhan Lục quân mrô 2 (27/8/1961-27/8/2021) , Khua mir sir ơi Nguyễn Xuân Phúc hơmâo mơ-it hră pơ-ar pơpŭ kơ ling tơhan, ƀing nai pơtô amăng Sang hră. Pơ ala brơi Ping gah, Kơnuk kơna hăng Ping gah ling tơhan dêh čar, Khua mir sir ơi Nguyễn Xuân Phúc hơmâo tơlơi pơpŭ kơ djop rơnuk Khua mua, ling tơhan amăng sang hră pơtô tơhan Lục quân mrô 2 hơdôm tơlơi pơpŭ hiam klă hloh. Akŏ pơdong amăng rơnuk blan wang ƀơi kual Dơnung pơkơdong glăi ayăt Mi pơklaih rơngai lŏn ia, găn rơgao 60 thun pơjing, pơtô hrăm, blah wang hăng pơđĭ kyar, djop rơnuk ling tơhan hơmâo pơtô mơng Sang hră djru prong prin amăng djop mơta bruă amăng rơnuk blah wang, pơgôp yôm phăn kiăngamăng pơklaih rơngai kual Dơnung, rơnuk rơnua lŏn ia ta hlâo adih hăng pơjing, wai pơgang lŏn ia ta ră anai. Truh ră anai, Sang hră jing sa amăng hơdôm anih pơtô hrăm ling tơhan Lục quân lĕ sang hră gưl prong, tơdơi kơ gưl prong hăng kơsem min boh thâo phrâo amăng bruă ling tơhan.

Khua mir sir dêh čar čang rơmang pơ anăp anao, Sang hră amra gir run, ƀu pơdơi pơplih phrâo, hrưn đĭ klă dong amăng pơtô hrăm hăng kơsem min, pơgiong klă hloh bruă jao, pơgôp prong prin amăng pơjing Khul ling tơhan ngă hơkrŭ, chính quy, rơgơi bruă, jai hrơi djơ̆ hăng tơlơi kiăng amăng rơnuk phrâo.

Siu Đoan: Pơblang