VOV4.Jarai - Čơtlăm lơ 29/7, ƀơi ƀôn prong Hồ Chí Minh, Khua mir sir dêh čar ta ơi Nguyễn Xuân Phúc hmâo nao čuă Ping gah, mơnuih ƀôn sang ƀôn prong Hồ Chí Minh glăk gir run pơgang, pơgăn klin Covid-19, amăng anun hmâo dua bôh tơring glông Hóc Môn hăng Củ Chi. Khua mir sir dêh čar ta ăt hmâo pơsur mơn mơnuih gum djru ƀơk brơi rim tơring glông 5 klai prăk, 5 bôh măi suă jua. Ñu lăi tơdah ƀu ngă tui Tơlơi črâo ba mrô 16 amăng 2 rơwang hrơi tơjuh rơgao, ƀôn prong Hồ Chí Minh amra dô̆ kơtang hloh dong yua kơ klin ngă, Khua mir sir dêh čar ta rơkâo mơnuih ƀôn sang ƀôn prong ngă tui pran jua gum hrom hơbit, pơdŏng dong hơdôm grŭp pơgang Covid-19 amăng ƀôn prong kiăng hyu rim anih anom, tañ thâo krăn, hyu huĕt ĕp, guang dar pơgăn klin. Ăt amăng cơtlăm lơ 29/7 mơn, ƀơi ƀôn prong Hồ Chí Minh, Khua mir sir dêh čar ta nao čuă hăng mă bruă ƀơi Sang bruă pơkra jrao Nanogen, anom glăk amăng rơwang lông lăng vaccine nanocovax. Khua mir sir dêh čar ta rơkâo Ding jum ia jrao ngă gal brơi kơ bruă ngă hră pơ-ar kơ Sang bruă tal 3, samơ̆ ăt pơhlôm djơ̆ glông hơdră, yua kơ tơlơi bơdjơ̆ nao ƀơi anăp tơlơi suaih pral mơnuih ƀông sang. Khua mir sir dêh čar ta ăt rơkâo mơn Sang bruă ƀu pơdơi ngă giong bôh thâo, pơkra vaccine klă hloh, ngă hơdư̆ đut hlah anô̆ ba glăi ƀu djơ̆ kah hăng tơlơi čang rơmang. Rơngiao kơ bơwih amăng lŏn ia lĕ khom yap nao yak ataih hloh lĕ sĭ kơ dêh čar tač rơngiao./.

Siu H’ Prăk: Pô pơblang