VOV4.Jarai - Mơguah lơ 13/7, ƀơi anih mă bruă Khua mir sir, Khua mir sir dêh čar ta ơi Nguyễn Xuân Phúc bưp ƀing Khua anih jưh pơ ala hơdôm bôh dêh čar Thái Lan, Chile, Cuba, dêh čar Nga lăi pơthâo hră mơ-ĭt lŏn ia ƀrô djơ̆ tal rai čơkă mă bruă Khua anih jưh pơ ala ƀơi dêh čar Việt Nam. Tŭ jum Khua anih jưh pơ ala kơ Nga ƀơi Việt Nam, ơi Gennady Bezdetko lăi pơthâo hră mơ-ĭt mơng lŏn ia, Khua mir sir dêh čar ta ơi Nguyễn Xuân Phúc pơsit, Việt Nam lăng yôm tơlơi rô nao rai gum hrom abih bang hăng Nga, pơsit na nao Nga lĕ sa amăng hơdôm bơnah gum hrom yôm phăn amăng hơdră bruă pơtom hiăp mơng pô, čang rơmang kơtưn hloh dong gum hrom hăng Nga amăng lu bruă. Khua mir sir dêh čar ta pơsit yôm Nga hơdôm hrơi blan rơgao hơđong na nao bruă kơđi čar, bơwih ƀong mơnuih mơnam pơđĭ kyar klă, pran gơgrong prong mơng lŏn ia amăng pơsir hơdôm tơlơi jar kơmar, amăng kual dưi pơđĭ tui. Khua anih jưh pơ ala kơ Nga pơsit Việt Nam jing bơnah đing nao hlâo mơng Nga ƀu djơ̆ kơnong kơ ƀơi kual Đông Nam Á ôh mơ̆ ñu dô̆ jing kual ASIA – Thái Bình Dương dong. Khua anih jưh pơsit amra gir run pơtruh tơlơi rô nao rai lu mơta kơplah wah dua bơnah./.

Siu H’ Prăk: Pô pơblang