VOV4.Jarai - Mơguah lơ 26/8, ƀơi Hà Nội, Khua git gai čih pơkra tơlơi phiăn dêh čar hơmâo  mông jơnum tal 13 tui tơlơi git gai mơng Khua mir sir ơi Nguyễn Xuân Phúc, Khua khul git gai kiăng kơ pơčrông lô, pơgôp hiăp kơ hơdôm boh thân dưi ngă amăng akŏ bruă: “Pơplih phrâo hăng ngă klă hơdôm hơdră brơi mơnuih ƀon sang gum hrŏm pơsir kơđi tơlơi amăng Sang phat kơđi djơ̆ hăng tơlơi rơkâo kiăng pơplih phrâo mơng tơlơi phiăn” hăng “Lăi pơthâo tơlơi rơkâo pơgôp hiăp kơ hơdră bruă pơtrun hơdôm tơlơi pơkă amăng pơphun phat kơđi lăng nao rai mơng ataih amăng Sang phat kơđi”. Anai lĕ dua boh tơhnal hơmâo Khua apăn bruă Ping gah Sang phat kơđi dêh čar rơkâo pơgôp hiăp mơng Khul git gai čih pơkra tơlơi phiăn dêh čar pơčrông lô hlâo kơ mơ-it nao hơdôm anom bruă bơdjơ̆ nao sem lăng hlâo kơ pơsit ngă tui, hăng tơlơi črâo ba amăng pơplih tơlơi phiăn pơ anăp anai. Tơdơi kơ hmư̆ tơlơi pơgôp hiăp mơng ƀing ding kơna Khul git gai, Khua mir sir ơi Nguyễn Xuân Phúc brơi thâo kiăng kơ hruă kjăp hơdôm hơnong pơkă pơplih phrâo hăng pran ngă tui tơlơi pơsit mơng Jơnum Ping gah tal XIII mơ̆ blung hlâo lĕ abih bang anom bruă čih pơkra tơlơi phiăn, khul čih pioh pơƀut glăi djop tơlơi pơgôp hiăp, pơčrông sai kiăng kơ tañ hơmâo tơlơi lăi pơthâo rơnuč, blung hlâo lĕ tơlơi pơkă amăng pơphun phat kơđi lăng nao rai mơng ataih amăng Sang phat kơđi; mơng anun ngă gêh gal brơi bruă pơsir kơđi lăng nao rai mơng ataih brơi sit nik dưi ngă tui tañ hloh.

Siu Đoan: Pơblang