VOV4.Jarai - Čơtlăm lơ 1/7, ƀơi Anih mă bruă Khua mir sir, Khua mir sir dêh čar ta ơi Nguyễn Xuân Phúc, Khua Grŭp git gai pơdŏng Akô̆ bruă hmâo laih mông mă bruă hăng lu nai tha prin, kơ-iăng nai tha prin, nai prin tha, ƀing juăt bruă amăng kơsem min tơlơi phiăn kiăng hmư̆ tơlơi gum pơhiăp kơ Akô̆ bruă pơdŏng hăng ngă giong kơnuk kơna djơ̆ phiăn djop mơnuih kơnar. Pơhiăp amăng mông mă bruă, ơi Nguyễn Xuân Phúc lăi rơđah, Akô̆ bruă phun lĕ amăng pơplih tơlơi phiăn, pơdŏng dong kơnuk kơna djơ̆ phiăn djop mơnuih mơnam dưm kơnar dêh čar Việt Nam. Hluai tui pran jua anun, Khua mir sir rơkâo ƀing juăt bruă, mnơnuih kơsem min gum pơhiăp kơ sa dua bôh yôm kah hăng rơwang mơng akô̆ bruă; hơdră dăp, tơlơi ba tơbiă mơng Akô̆ bruă; bôh yôm kơsem min, hơdôm mơta bruă ngă dơlăm mơng Akô̆ bruă; pơpha hơdôm bôh ƀirô ngă tui hơdôm mơta bruă... hăng hơdôm bôh yôm pơkon mơ̆ ƀing juăt bruă, kơsem min bôh thâo phrâo čang rơmang gum pơhiăp. Khua mir sir pơsit, hơdôm tơlơi gum pơhiăp amăng mông mă bruă tal anai amra dưi tŭ mă djop lom ngă giong kơčăo bruă pơdŏng Akô̆ bruă. Grŭp črâo ba amra rơkâo dong tơlơi gum pơhiăp ƀing juăt bruă, mơnuih kơsem min bôh thâo phrâo, pok hơdôm mông bơkơtuai amăng sa dua bruă pơpkon kiăng tŭ mă hơdôm tơlơi gum pơhiăp pơgôp kơ Akô̆ bruă./.

Siu H’ Prăk: Pô pơblang