VOV4.Jarai - Čơtlăm lơ 6/1, ƀơi anih mă bruă Khua mir sir, Khua mir sir dêh čar ta ơi Nguyễn Xuân Phúc hmâo jao Tơlơi pơsit đĭ grat mơng Trung tướng đĭ Thượng tướng kơ Kơ-iăng Khua Ding jum kông ang Trần Quốc Tô hăng Lương Tam Quang. Pơhiăp amăng mông ngă lơphet jao Tơlơi pơsit, pơ ala kơ khua git gai Ping gah, Kơnuk kơna, hơ-ư̆č hmưi dua gơñu hmâo đĭ grat mơng Trung tướng đĭ Thượng tướng, Khua mir sir dêh čar ơi Nguyễn Xuân Phúc pơsit, ơi Trần Quốc Tô hăng ơi Lương Tam Quang lĕ mơnuih apăn bruă hmâo tơlơi pơmin kơjăp, pran jua mă bruă klă; dưi pơtô pơhrăm phun, djơ̆ hơdră pơkă, tơlơi hrăm hăng bôh thâo klă; dưi pơhrăm, lông lăng hăng kơjăp bruă mơng bôh nik hyu mă bruă, kơdŏng blah; hmâo lu tơlơi găn rơgao amăng git gai, črâo bruă, wai lăng hơdôm bôh anom, plơi pla. Khua mir sir dêh čar ta ơi Nguyễn Xuân Phúc đăo gơnang hăng čang rơmang dua gơñu gum hrom dong grŭp Ping gah kông ang dêh čar, git gai Ding jum kông ang djă pioh klă pran jua ngă hơkrŭ klă hiam, djă kơjăp dong hăng ngă tui pran jua, gru rŭp tơhan kông ang mơnuih ƀôn sang “yua kơ lŏn ia wor bit drơi pô, yua kơ mơnuih ƀôn sang mơ̆ mă bruă” amăng rơwang phrâo./.

Siu H’ Prăk: Pơblang