VOV4.Jarai - Ngă tui jơlan hơdră bruă mă ƀơi ƀôn prong Hồ Chí Minh, tlam lơ 21/5, Khua mir sir dêh čar ta ơi Nguyễn Xuân Phúc hơmâo nao pel ĕp bruă pơgang klin, pơhlôm brơi abih bang mơnuih ƀon sang dưi khăm pơjrao tơlơi ruă ƀơi Sang ia jrao tơring glông Củ Chi. Ƀơi anăp kơ tơlơi tơnap tap mơng klin Covid-19, Khua mir sir dêh čar ta lăi rơđah, tui tơlơi git gai mơng Ping gah, djop anom bruă gum hrŏm, amăng anun, ƀing nai ia jrao, ơi ia jrao hơmâo gir run tơhrơi kah hăng mlăm djru amăng bruă pơgang klin amăng djop mơta  mơng pơčrang lăng, guang dar, pơčlah, pơgang hĭ klin, pơhlôm brơi tơlơi suaih pral kơ abih bang mơnuih ƀon sang. Khua mir sir dêh čar ta pơpŭ bơni ƀing apăn bruă, nai ia jrao ƀôn prong Hồ Chí Minh hăng Sang ia jrao tơring glông Củ Chi hơmâo ngă tui djơ̆, tŭ yua hơdôm hơdră amăng pơgang klin hăng lăi pơtong hăng pran jua ƀu brơi djop sang ia jrao amăng đơ đam dêh čar tơnap tap yua lu mơnuih ƀă klin Covid-19. Hrŏm hăng tơlơi git gaio mơng Ping gah, Kơnuk kơna, Khua mir sir dêh čar ta rơkâo djop gưl pơgang klin kjăp hloh, biă mă ñu lĕ ƀơi hơdôm ƀon prong , sang măi , anih tuai čuă ngui, sang ia jrao, anăm brơi hơmâo tơlơi truh sat ôh.

Siu Đoan: Pơblang