VOV4.Jarai -  Čơtlăm lơ 14/9, Khua mir sir dêh čar ta ơi Nguyễn Xuân Phúc hmâo mă bruă hăng khua mua Sang phăt kơđi mơnuih ƀôn sang dêh čar ta, Anom bruă Khua mir sir, Grŭp apăn bruă Ping gah dêh čar, Anom pel ĕp kơđi tơlơi dêh čar, Ding jum kông ang hăng Jơnum min tơlơi phiăn Khua pơ ala mơnuih ƀôn sang dêh čar ta kơ pok pơhai Kơčăo bruă mơng gơnong bruă kơ pơsir hră pơ-ar kơđi pơsit pơdjai tui djơ̆ tơlơi pơkă mơng tơlơi phiăn.

Khua mir sir dêh čar ta ơi Nguyễn Xuân Phúc lăi rơđah hră pơ-ar kơđi pơsit pơdjai lĕ tơlơi dưi hmâo mơnuih ƀôn sang hăng Khua pơ ala mơnuih ƀôn sang dêh čar ta đing nao biă. Yua anun, Sang phăt kơđi dêh čar, Anom pel ĕp kơđi tơlơi dêh čar, Ding jum Kông ang hăng Anom bruă Khua mir sir gum hrom ngă tui ba glăi bôh tơhnal dong Kơčăo bruă mơng hơdôm gơnong bruă rơđah hloh dong. Tơdơi kơ bruă jơnum anai kiăng kơtưn gum hrom kơjăp hloh dong lom pel ĕp hơdôm hră pơ-ar, ƀu pioh hmâo tơlơi ngă soh lom pơsit ngă tơnap lom ngă tui tơlơi phiăn pơsir. Khua mir sir dêh čar ta rơkâo, lom ngă tui bruă jao, hơdôm bôh ƀirô khom klah čun, pơsit hăng pơsit djơ̆ bôh than kiăng mơng anun hmâo bruă pơgăn, pơgang hlôm hlâo hơdôm mơnuih ngă soh ăt kah hăng pel ĕp tơlơi rơkâo đĭ pơplih pơkra tơlơi pơkă amăng tơlơi phiăn bơdjơ̆ nao./.

Siu H’ Prăk: Pô pơblang