VOV4.Jarai -  Grŭp Khua pơ ala kơ gưl dlông Việt Nam yua kơ Khua mir sir dêh čar ta ơi Nguyễn Xuân Phúc ba jơlan hlâo nao pơhmư̆ mông Bơkơtuai hrom gưl dlông Tal jơnum lok 76 Khul apăn bruă Sang gum hơbit djop dêh čar. Mơguah lơ 21/9, tui hăng mông ƀơi New York, ƀơi Ƀirô mă bruă Sang gum hơbit djop dêh čar pơ̆ ƀôn prong New York, dêh čar Mi, Mông bơkơtuai hrom gưl dlông Tal jơnum lok 76 Khul apăn bruă Sang gum hơbit djop dêh čar hmâo pok pơhai hăng anăn ñu “Gum hrom đăo gơnang hăng gơgrong pô – Anăp nao hơkrŭ glăi tơdơi kơ Covid-19 ngă, pơdong glăi kơjăp, pơgang bôh lŏn, pơtrut tơlơi dưi ană mơnuih hăng pơplih bruă Sang gum hơbit djop dêh čar”. Pơhiăp amăng mông jơnum pok phun, ơi Abdulla Shahid, Khua Khul apăn bruă Sang gum hơbit djop dêh čar tal 76 pơkôl amra pơtrut gum hrom jar kơmar kiăng bŏng glăi hăng klin Covid-19, hơkrŭ glăi hăng pơđĭ kyar tơdơi kơ klin ruă tui jơlan gah kơjăp, hluai tui Jơlan hơdră mă bruă truh thun 2030 yua kơ tơlơi pơđĭ kyar kơjăp phik. Mông bơkơtuai hrom gưl dlông amra pơphun truh lơ 27/9, hăng tui jơlan hơdră, Khua mir sir dêh čar ơi Nguyễn Xuân Phúc amra hmâo tơlơi pơhiăp yôm phăn amăng čơtlăm lơ 22/9 mông New York./.

Siu H’ Prăk: Pô pơblang