VOV4.Jarai - Mơguah kơ 18/11, ƀơi Hà Nội, Khua mir sir dêh čar ta ơi Nguyễn Xuân Phúc nao pơhmư̆ mông ngă lơphet hơdor glăi 70 thun hrơi pơdŏng Sang hră Đại học Sư phạm Hà Nội hăng čơkă mă Miđai mă bruă dăp tal dua. Pơ ala kơ khua git gai Ping gah, Kơnuk kơna, Khua mir sir dêh čar ta ơi Nguyễn Xuân Phúc hur har pran jua hơ-ư̆č hmưi hơdôm rơnuk mơnuih apăn bruă, ƀing nai pơtô čơđai sang hră, mơnuih mă bruă, čơđai sang hră, ƀing hrăm gưl dlông, čơđai Sang hră Đại học Sư phạm Hà Nôị kơ hơdôm bôh than dưi ngă amăng 70 thun rơgao. Pơsit, Ping gah, Kơnuk kơna lăng bruă pơtô pơhrăm, kơsem min hăng bôh thâo phrâo măi mok jing hơdră mơng lŏn ia ba jơlan hlâo, Khua mir sir dêh čar ta ơi Nguyễn Xuân Phúc lăi rơđah, Sang hră Đại học Sư phạm Hà Nội dưi hmâo Kơnuk kơna pơsit lĕ sa amăng dua bôh sang hră đại học sư phạm phun mơng đơ đam dêh čar. Bâo glăi bôh pia “Lom sang hră pơđĭ kyar, djop mơta leng kơ pơđĭ kyar”, Khua mir sir dêh čar ta rơkâo Sang hră Đại học Sư phạm Hà Nội đing nao ngă giong wot hơdră hăng bruă mă, pơsit dong pran gơgrong sa sang hră phun mơng lŏn ia; pơplih phrâo abih bang gah jơlan hơdră hăng bôh yôm pơtô pơhrăm djơ̆ hăng tơlơi kiăng phrâo ră anai./.

Siu H’ Prăk: Pô pơblang