VOV4.Jarai - Khua mir sir dêh čar ta ơi Nguyễn Xuân Phúc phrâo git gai mông Jơnum lok 3 Khul pơgang lŏn ia hăng rơnuk rơnua plơi pla rơwang bruă mơng thun 2016-2021. Khua mir sir dêh čar brơi thâo mông jơnum tal 3 anai hmâo tơhnal klah čun mơng rơwang bruă; hrom hăng anun črông sai, tŭ ư hrom hơdôm bôh yôm phăn, pơjing tơhnal kơ bruă mă mơng Khul pơgang lŏn ia hăng rơnuk rơnua plơi pla amăng rơwang bruă phrâo ngă giong klă bruă jao tui tơlơi pơkă mơng Phiah phiăn hăng tơlơi phiăn.

Mông jơnum tal 3 Khul pơgang lŏn ia hăng rơnuk rơnua plơi pla rơwang bruă 2016-2021

Khua mir sir dêh čar ta ơi Nguyễn Xuân Phúc lăi rơđah, amăng rơwang ră anai, lŏn ia glăk dŏng ƀơi anăp lu tơlơi lông gah rơnuk rơnua mơng hlâo hăng phrâo anai, amăng anun hmâo tơlơi pơplih ayuh hyiăng, biă ñu lĕ klin ruă Covid-19 glăk ngă tơnap jing tơlơi prong mơng lŏn ia. Tơlơi anai kiăng khul tơhan, biă ñu khul ling tơhan, kông ang hăng pơtom hiăp khom đing nao ngăn rơnoh pioh bŏng glăi, pơgang prong hloh tơlơi suaih pral hăng tơlơi hơdip mơng mơnuih ƀôn sang. Ƀơi anăp tơlơi klin ruă Covid-19 pơ̆ lu tơring čar kual Dơnung dêh čar, Khua mir sir dêh čar ta ơi Nguyễn Xuân Phúc rơkâo Kơnuk kơna, hơdôm ding jum, hăng gong gai hơdôm bôh plơi pla đing nao djop ngăn rơnoh pơgang, pơgăn klin, biă ñu pơhlôm djop vaccine tlâ̆o pơgang kơ mơnuih ƀôn sang./.

Siu H’ Prăk: Pô pơblang