VOV4.Jarai - Čơtlăm lơ 15/7, ƀơi Anom mă bruă Khua mir sir, Khua mir sir dêh čar ta ơi Nguyễn Xuân Phúc hmâo bruă bơkơtuai amăng telephone hăng Khua mir sir dêh čar Indonesia, ơi Joko Widodo kơ gum hrom dua bơnah ăt kah hăng hơdôm tơlơi amăng kual hăng jar kơmar hơdai bơ đing nao. Dua gơñu hmâo tŭ ư khom kơtưn gum hrom, lăi pơthâo tơlơi găn rơgao amăng bŏng glăi klin Covid-19 hăng mă yua vaccine ba glăi bôh tŭ yua. Ơi Joko Widodo pơsit yôm bôh than mơng Việt Nam amăng bruă ngă tui dua mơta, wai lăng rah klin ruă hăng pơđĭ kyar rah bruă bơwih ƀong mơnuih mơnam. Khua mir sir dêh čar ta ơi Nguyễn Xuân Phúc lăi nao mơn kơ hơdôm tơlơi mơ̆ Indonesia glăk bŏng glăi amăng bruă kơdŏng klin Covid-19; đăo gơnang Indonesia amra tañ wai lăng klin ruă hăng hơkrŭ bruă bơwih ƀong. Khua mir sir dêh čar ta bơni kơ Indonesia hmâo gum hrom klă laih hăng Việt Nam amăng bruă pơgang ba mơnuih mă bruă bưp tơnap yua kơ klin ruă Covid-19; rơkâo Indonesia ngă gal brơi dong kơ mơnuih Việt Nam ƀơi Indonesia dưi pel ĕp, pơjrao, dô̆ čơlah amăng tơlơi kiăng hloh./.

Siu H’ Prăk: Pô pơblang