VOV4.Jarai -  Ƀơi ƀirô mă bruă Khua pơ ala mơnuih ƀôn sang dêh čar Cuba, Khua mir sir dêh čar ta ơi Nguyễn Xuân Phúc hmâo bơkơtuai laih hăng Khua git gai wai lăng pơ ala mơnuih ƀôn sang Cuba Esteban Lazo Hernández.

Khua mir sir dêh čar ta ơi Nguyễn Xuân Phúc pơsit Khua pơ ala mơnuih ƀôn sang ăt kah hăng hơdôm ding jum, gơnong bruă mơng Việt Nam amra gum hrom hăng Khua pơ ala mơnuih ƀôn sang Cuba, bơkơtuai tơlơi găn rơgao kơ hơdôm tơlơi dua Khua pơ ala mơnuih ƀôn sang hơdai bơ đing nao, gum hrom kơjăp hloh amăng bơkơtuai grŭp khua git gai wai lăng pơ ala mơnuih ƀôn sang, lăi pơthâo tơlơi găn rơgao bruă khua pơ ala mơnuih ƀôn sang, ngă tui bruă mă mơng Khua pơ ala mơnuih ƀôn sang amăng glông bruă kơđi čar, bruă pơtom hiăp khua pơ ala mơnuih ƀôn sang hăng gum hrom amăng hơdôm mông bơkơtuai khua pơ ala mơnuih ƀôn sang jar kơmar lu bơnah. Khua mir sir dêh čar ta ơi Nguyễn Xuân Phúc đăo gơnang lĕ dua Khua pơ ala mơnuih ƀôn sang, hơdôm Jơnum min hăng dua Grŭp khua pơ ala mơnuih ƀôn sang giăng mah mơng Khua pơ ala mơnuih ƀôn sang dua bôh dêh čar amra gum hrom kơjăp dong, dŏng yua, gum djru klă hơdôm bruă gum hrom kơplah wah dua bôh dêh čar hluai tui bruă pơsit hơdôm hră pơ-ar gum hrom dua bơnah./.

Siu H’ Prăk: Pô pơblang