VOV4.Jarai - Amăng rơwang tal nao čuă dêh čar Nga, čơtlăm lơ 30/11 ƀơi Mat-xcơ-va, Khua mir sir dêh čar ta ơi Nguyễn Xuân Phúc hmâo bruă bơkơtuai hăng Khua mir sir dêh čar Nga ơi Vladimir Putin. Amăng bruă bơkơtuai, dua gơñu pơsit yôm gum hrom pơgang lŏn ia, rơnuk rơnua plơi pla dua bôh dêh čar hmâo laih lu bôh than yôm phăn, ngă dơlăm tơlơi rô nao rai bruă kơđi čar đăo gơnang dua bôh dêh čar hăng pơsit pran jua ngă brơi bruă gum hrom bơwih ƀong jing phun than yôm phăn mơng tơlơi rô nao rai kơplah wah Việt Nam hăng Nga.

Dua gơñu pơsit apui yua hăng ia jâu hyuh jing sa amăng hơdôm phun than mơng bruă gum hrom abih bang, ba glăi bôh tŭ yua sit nik kơ dua bôh dêh čar. Pơđut bruă bơkơtuai, Khua mir sir dêh čar ta ơi Nguyễn Xuân Phúc hăng Khua mir sir dêh čar Nga Putin hmâo ba tơbiă Tơlơi lăi pơtŏng hrom kơ Tơhnal lăng tơlơi rô nao rai gum hrom đăo gơnang dơlăm kơplah wah dua bôh dêh čar amăng abih bang hơdôm bruă jai hrơi jai nao dơlăm, sit nik hăng ba glăi bôh tơhnal, djơ̆ hăng bôh tŭ yua sui thun mơng dua bôh dêh čar, djuai ania, djru kơ tơlơi rơnuk rơnua, hơđong hăng pơđĭ kyar kơjăp ƀơi kual hăng ƀơi rŏng lŏn tơnah./.

Siu H’ Prăk: Pô pơblang