VOV4.Jarai -  Amăng tal rai čuă sit nik dêh čar Việt Nam, mơguah lơ 25/8, Khua mir sir dêh čar ta ơi Nguyễn Xuân Phúc hmâo mông bơkơtuai hăng Kơ-iăng Khua mir sir dêh čar Mi Kamala Harris. Amăng mông bơkơtuai, Khua mir sir dêh čar ta ơi Nguyễn Xuân Phúc pơsit, Việt Nam ngă tui ha sa hơdră bruă pơtom hiăp rơngai, gơgrong pô hăng amra jing bơnah gum hrom đăo gơnang, djru klă amăng tơlơi rơnuk rơnua, hơđong hăng pơđĭ kyar ƀơi rŏng lŏn tơnah.

Khua mir sir dêh čar ta ơi Nguyễn Xuân Phúc hmâo mông bơkơtuai hăng Kơ-iăng Khua mir sir dêh čar Mi Kamala Harris

Hluai tui anun, Việt Nam lăng Mi lĕ sa amăng hơdôm bơnah gum hrom ba jơlan hlâo. Việt Nam čang rơmang gum hrom Mi kơtưn đĭ dong tơlơi rô nao rai gum hrom abih bang, jai hrơi nao dơlăm, hơdai bơ hmâo bôh tŭ yua tui phiăn pơkă pơpŭ tơlơi dưi pô, đơ đam lŏn ia hăng hơdră pơkă mơng tơdruă. Kơ-iăng Khua mir sir dêh čar, yă Kamala Harris pơsit yôm Việt Nam hmâo gir run wai lăng klin Covid-19 hăng pơsit glăi tơlơi pơkôl mơng Mi, djru Việt Nam pơtrut kơdun glăi Covid-19. Dua gơñu tŭ ư hrom kơtưn tơlơi rô nao rai hăng pơtrut kơtang gum hrom amăng lu bruă. Biă ñu lĕ gum hrom bơwih ƀong sĭ mơdrô, rơnuk rơnua lŏn ia, hơkrŭ pơsir tơlơi blah ngă, bruă ia jrao, bôh thâo măi mok...

Siu H’ Prăk: Pô pơblang