VOV4.Jarai - Amăng rơwang nao čuă gưl kơnuk kơna Kur, lơ 22/12, Khua mir sir dêh čar ta ơi Nguyễn Xuân Phúc bưp ƀô̆ mơta ƀing bơwih ƀong dêh čar Việt Nam hăng anom bơwih ƀong Khmer djuai ania Yuan ƀơi dêh čar Kur. Tơdơi kơ hmư̆ tơlơi pơhiăp mơng khua pơ ala hơdôm bôh anom bơwih ƀong, Khua mir sir dêh čar ta mơ-ak jơlan gah tuh pơplai mơng Việt Nam klă hloh, hăng pơsit pran jua mơng hơdôm bôh anom bơwih ƀong hmâo lu tơlơi găn rơgao.

Khua mir sir dêh čar ta pơsit, bruă mă mơng hơdôm bôh anom bơwih ƀong lĕ yôm phăn hăng bơni tơlơi gir run mơng hơdôm bôh anom bơwih ƀong Việt Nam hơdôm hrơi rơgao. Khua mir sir dêh čar ta ăt lăi rơđah mơn amra črâo ba hơdôm ding jum, gơnong bruă kơtưn gum hrom hăng gơyut kiăng djru hơdôm anom bơwih ƀong Việt Nam pơtlaih tơlơi tơnap. Tui hăng Khua mir sir dêh čar ta, ƀing bơwih ƀong Việt Nam khom jing pô gơgrong hlâo, pơphun brơi, pơjing pran pơtrut phrâo amăng sĭ mơdrô tui pơplai, ngă gal brơi lu mơta hloh tơlơi rô nao rai ba glăi bôh tơhnal kơplah wah dua bôh dêh čar, biă ñu bruă bơwih ƀong./.

Siu H’ Prăk: Pơblang