VOV4.Jarai -  Amăng hrơi mă bruă blung a ƀơi New York, dêh čar Mi, lơ 21/9 yap tui mông ƀơi Mi, Khua mir sir dêh čar ta ơi Nguyễn Xuân Phúc ăt hmâo laih mơn sa dua bruă bưp hăng Khua mua gưl dlông hơdôm bôh dêh čar hăng Khua Sang prăk rŏng lŏn tơnah. Amăng mông bưp Khua mir sir dêh čar Hàn Quốc Moon Jae-in, Khua mir sir Hàn Quốc čang rơmang pơtrut kơtang hloh dong tơlơi rô nao rai gum hrom hăng Việt Nam, hrưn đĭ pơhrui glăi 100 klai dolar Mi mơng gơnam sĭ kơdêh čar tač rơngiao amăng thun 2023, pơtrut gum hrom amăng hơdôm bruă bơwih ƀong mrô, gơnam tam, prăk kak... Amăng hơdôm hrơi klin Covid-19 ngă, Khua mir sir ơi Moon Jae-in lăi pơtŏng, Kơnuk kơna Hàn Quốc pơsit djru kơ Việt Nam rơbêh kơ 1 klăk liều vaccine hăng amra ba nao pơ̆ Việt Nam amăng krah blan 10 pơ̆ anăp. Amăng mông bưp hăng ơi Micheal Martin, Khua dêh čar Ai-len, dêh čar ngă Khua pơplih nao rai mơng Khul pơgang rơnuk rơnua Sang gum hơbit djop dêh čar blan 9/2021, Khua mir sir dêh čar ta rơkâo tơdơi kơ wai lăng klă klin ruă, dua bơnah tañ tô glăi bruă bơkơtuai grŭp hăng bưp hơdôm gưl, pơtrut gum hrom amăng hơdôm bruă pơkon. Ăt amăng lơ 21/9 mơn, Khua mir sir dêh čar ta hmâo hơdôm bruă bưp ƀing khua mua, khua git gai gưl dlông hơdôm bôh dêh čar Thái Lan, Bangladesh, Sri Lanka, Latvia, Thụy Điển, Guyana, Lesotho, Costa Rica, Colombia, Uruguay bơkơtuai nao rai lu bruă pơdŏng pơjing sit nik kiăng pơtrut kơtang, pơđĭ kyar tơlơi rô nao rai hăng hơdôm bôh dêh čar ba glăi bôh tơhnal hăng mut dơlăm hloh./.

Siu H’ Prăk: Pô pơblang