VOV4.Jarai - Amăng rơwang čuă giăng mah dêh čar Lao mơguah lơ 10/8, Khua mir sir dêh čar ơi Nguyễn Xuân Phúc hmâo laih tơlơi pơhiăp yôm phăn amăng Khua pơ ala mơnuih ƀôn sang dêh čar Lao, glăk ƀơi tal jơnum lok sa Khua pơ ala mơnuih ƀôn sang tal 9. Khua mir sir dêh čar ta pơdah pran jua ư-ang yôm phăn lom jing pô jak iâu jar kơmar blung a dưi tơgŭ pơhiăp amăng anih Jơnum phrâo kơdrưh kơdrom anai ƀơi anăp Khua pơ ala mơnuih ƀông sang tal 9 dêh čar Lao. Tơlơi pơhiăp mơng Khua mir sir ơi Nguyễn Xuân Phúc hmâo yap glăi laih hơdôm plăng ư-ang mơng tơlơi rô nao rai dua bôh dêh čar. Khua mir sir lăi lĕ, amăng tơlơi rô nao rai kơđi čar, hmâo bruă mă yôm phăn mơng gum hrom kơplah wah Khua pơ ala mơnuih ƀôn sang dua bôh dêh čar. Tơlơi dŏng yua mơng Khua pơ ala mơnuih ƀôn sang dua bôh dêh čar amra jing anih gơnang djơ̆ phiăn kơjăp kơ tơlơi gum hrom ba glăi bôh tơhnal mơng Kơnuk kơna, Jơnum min djop djuai ania mơnuih mơnam lŏn ia, hơdôm plơi pla, hơdôm khul grŭp mơnuih mơnam hăng ngă tui tơlơi gir run, pơčeh phrâo mơng anom bơwih ƀong, mơnuih ƀôn sang dua bôh dêh čar. Pơđut tơlơi pơhiăp, Khua mir sir ơi Nguyễn Xuân Phúc lăi rơđah, dua bôh dêh čar mơñum hrom hăng glông ia krông Mekong, hơdai bơ ah rŏng nao ruăi čư̆ Trường Sơn, tơlơi ayuh hyiăng mơng sui hăng anai kah hăng pơkĕ kơjăp dua bôh lŏn ia, dua djuai ania. Khua mir sir pơsit, anun lĕ tơlơi pơkĕ hrom hmâo hơnong ñu hlong hlar, gum hrom pơđĭ kyar pơdrong asah./.

Siu H’ Prăk: Pô pơblang