VOV4.Jarai - Lơ 24/5, Khua mir sir dêh čar ta ơi Nguyễn Xuân Phúc hơmâo mông pơhiăp telephôn hăng khua mir sir dêh čar Khač ơi Tập Cận Bình. Amăng mông pơhiăp telephôn, khua mir sir dêh čar ta ơi Nguyễn Xuân Phúc lăi pơtong Ping gah hăng Kơnuk kơna Việt Nam lêng kơ đing nao bruă pơtom hiăp rơngai, ngă pô, djop bơnah, djop mơta, amăng anun lăng yôm ngă klă bruă pơtom hiăp hăng dêh čar ha guai, ngă hrŏm djop mơta bruă hăng dêh čar Khač. Khua mir sir dêh čar ta lăi nao sa, dua hơdră yôm phun kiăng pơtrut tơlơi rô nao rai kơplah wah dua boh dêh čar pơ anăp anai anun lĕ kơtưn đăo gơnang tơdruă, pơtrut ngă hrŏm djop mơta, bơkơnar, ba glăi tơlơi dưi hrŏm.

Khua mir sir  ơi Nguyễn Xuân Phúc pơhiăp telephôn hăng Khua git gai Ping gah, Khua mir sir dêh čar Khač

Khua git gai Ping gah, khua mir sir dêh čar Khač ơi Tập Cận Bình pơdah pran đăo gơnang hăng tơlơi git gai mơng Ping gah Cộng sản Việt Nam, mơnuih ƀon sang Việt Nam amra ngă trih kih djop bruă, tơlơi pơsit mơng Jơnum Ping gah tal XIII ba tơbiă. Ñu ăt lăi pơtong, Ping gah, Kơnuk kơna hăng mơnuih ƀon sang dêh čar Khač lêng kơ lăng yôm tơlơi rô nao rai hăng dêh čar Việt Nam, čang rơmang hăng amra gum hrŏm hăng Ping gah, Kơnuk kơna laih dong mơnuih ƀon sang Việt Nam tŏ tui kơtưn tơlơi rô nao rai hiam klă, ngă hrŏm amăng djop mơta bruă dong kơplah wah Việt Nam - Khač kiăng jai hrơi pơđĭ kyar dong pơ anăp.

Siu Đoan: Pơblang