VOV4.Jarai - Amăng tơlơi mơ-ak mơng Hrơi Jơnum mơng lŏn ia – abih bang mơnuih ƀôn sang nao ruah khua, mơguah lơ 23/5, Khua mir sir dêh čar ta ơi Nguyễn Xuân Phúc hrom hăng bơnai ñu hăng ƀing ruah khua kual plĕ hră 041, anom ruah khua mrô 9 (tơring kual Củ Chi, tơring glông Củ Chi, ƀôn prong Hồ Chí Minh) hmâo plĕ laih hơdôm pok hră ruah khua pơ ala mơnuih ƀôn sang dêh čar ta tal 15 hăng khua pơ ala Khul pơ ala mơnuih ƀôn sang rơwang bruă mơng thun 2021-2026.

Tơdơi kơ plĕ hră mơtăm, Khua mir sir dêh čar ta ơi Nguyễn Xuân Phúc lăi glăi tơlơi tơña mơng mơnuih hyu mă tơlơi pơhing phrâo. Khua mir sir dêh čar ta lăi rơđah, gum hrom hơbit djuai ania lĕ tơlơi prong hloh mơ̆ Ping gah, Wa Hồ kiăng khăp đing nao lu, črâo ba, biă ñu lĕ amăng hơdôm hrơi jơnum prong kah hăng Hrơi jơnum lŏn ia, abih bang mơnuih ƀôn sang nao plĕ hră hăng hơdôm bruă mă yôm phăn pơkon mơng lŏn ia. Biă ñu, wot amăng hơdôm hrơi lŏn ia hmâo tơlơi ayuh hyiăng ƀu klă ngă, ia ling dăo, pran jua gum hrom hơbit djuai ania jing dưi ngă tui. Anai ăt lĕ phiăn juăt yôm phăn mơng djuai ania Việt Nam. Pran jua anun ƀu pơdơi pơđĭ tui lu wot hăng ngă tui kơtang amăng kơdŏng blah ayăt truh bruă pơdŏng hăng pơđĭ kyar lŏn ia./.

Siu H’ Prăk: Pô pơblang