VOV4.Jarai - Tlam lơ 14/7, ƀơi Ƀirô mă bruă, Khua mir sir dêh čar ta ơi Nguyễn Xuân Phúc hơmâo mông pơhiăp telephôn hăng Khua mir sir Rumani Klaus Werner Iohannis. Amăng mông pơhiăp telephôn, dua čô khua hơmâo pơlăi nao rai lu hơdră bruă sit nik kiăng kơ pok prong hăng ngă dơlăm tui tơlơi rô nao rai dua bơnah, biă mă ñu djă pioh hăng pơtrut jơnum pơbưp nao rai laih dong pơtrut ngă hrŏm amăng sa, dua mơta bruă anun lĕ bơwih ƀong huă-sĭ mơdrô, pơtô hrăm, ngă hrŏm amăng bruă mă.

Khua mir sir Rumani brơi thâo, hluai tui tơlơi rô nao rai hiam klă mơng dua bơnah, Kơnuk kơna Rumani pơsit djru brơi soh sel kơ Việt Nam 100 rơbâo liều vaccine AstraZeneca kah hăng amra sem lăng kơ bruă jao glăi mrô vaccine brơi dêh čar Việt Nam pơ anăp. Khua mir sir dêh čar ta ơi Nguyễn Xuân Phúc pơdah pran pơpŭ bơni tơlơi gum djru yôm phăn mơ̆ Khua mir sir hăng mơnuih ƀon sang Rumani djru brơi kơ Việt Nam amăng thun blan tơnap tap, pơsit tong mrô vaccine anai amra gum pơgôp sit nik amăng bruă pơgang klin Covid-19 ƀơi Việt Nam.

Siu Đoan: Pơbang