VOV4.Jarai -  Čơtlăm lơ 6/9, ƀơi Anom mă bruă Khua mir sir, Khua mir sir dêh čar ta ơi Nguyễn Xuân Phúc tŭ jum Khua anih jưh pơ ala kơ dêh čar India ƀơi dêh čar Việt Nam Pranay Verma. Khua mir sir dêh čar pơdah pran jua bơni kơ Kơnuk kơna India hmâo djru kơ Việt Nam măi pơjing oxy hăng hơdôm gơnam mă yua gah ia jrao. Khua mir sir dêh čar ta čang rơmang Khua anih jưh pơ ala pơtrut Kơnuk kơna India brơi kơ Việt Nam čan ječ 10 klăk liều vaccine amăng hơdôm hrơi pơ̆ anăp, hrom hăng anun sĭ jrao pơjrao klin ruă Covid-19 ăt kah hăng hơdôm gơnam mă yua, măi mok gah ia jrao kơ Việt Nam. Pơ̆ anăp anai, Khua mir sir dêh čar ta ơi Nguyễn Xuân Phúc rơkâo Khua anih jưh pơ ala lăng ba pơtrut gum hrom dua bôh dêh čar. Amăng anun hmâo djă pioh hăng pơtrut pơbưp gưl dlông, hơdôm gưl hăng bơkơtuai mơnuih ƀôn sang; pơtrut kơtang ngă tui hơdôm hơdră pơkă gum hrom hmâo laih kah hăng Jơnum min gum hrom lu mơta Việt Nam hăng India kơ Gum hrom bơwih ƀong, Sĭ mơdrô, Bôh thâo phrâo hăng Hơdră phrâo măi mok; Hơduah lăng bruă kơđi čar hăng hơdră lăng nao rai mơng ataih ƀudah ƀơi anăp. Dua bơnah kiăng gum hrom pơphun hơdôm bruă mă hmâo bôh tŭ yua, sit nik hơdor glăi 50 thun hrơi pơdong bruă pơtom hiăp dua bôh dêh čar; pơtrut klă bruă ngă tui jơlan hơdră bruă ngă pok pơhai gum hrom abih bang rơwang 2021-2023 kiăng pơplih phrâo hơdôm bruă gum hrom mơ̆ dua bơnah tŭ ư hrom laih anun./.

Siu H’ Prăk: Pô pơblang