VOV4.Jarai - Tlam lơ 21/6, ƀơi Anom bruă Khua mir sir, Khua mir sir ơi Nguyễn Xuân Phúc tŭ jum Khua ding jum pơtom hiăp dêh čar Singapore Vivian Ballakrishnan, pơbưp, mă tơngan amăng tal rai čuă sit nik dêh čar Việt Nam mơng lơ 20 truh 23/6. Ƀơi mông bưp, Khua mir sir ơi Nguyễn Xuân Phúc lăng yôm biă kơ tơlơi ngă hrŏm kơplah wah Việt Nam hăng Singapore pơđĭ kyar jai hrơi dlăm hloh, prong hloh.

Singapore jing sa amăng hơdôm boh dêh čar tuh pơ alin prong ƀơi Việt Nam; biă ñu mơng thun 2020 truh ră anai jing dêh čar dong mrô hlâo amăng 70 boh dêh čar hăng kual lŏn tuh pơ alin pơ Việt Nam; hơbô̆ bruă Kual sang măi pơkra gơnam Việt Nam - Singapore djru ba tơlơi gêh gal bơwih ƀong huă mơnuih mơnam ƀơi Việt Nam. Kơ tơlơi ƀơi ia rơsĭ Ngŏ, Khua ding jum pơtom hiăp dêh čar Singapore pơsit, lăng yôm bruă pơhlôm rơnuk rơnua, hơđong kơjăp, rô nao rai rơngai ƀơi ia rơsĭ hăng ƀơi rơngit adai kual ia rơsĭ Ngŏ, hơđong kơjăp kiăo tui tơlơi phiăn, amăng anun hơmâo Công ước Tơlơi phiăn ia rơsĭ 1982.

Siu H’Mai: Pơblang