VOV4.Jarai - Mơguah lơ 10/1, Khua mir sir ơi Nguyễn Xuân Phúc tŭ jum Đại tướng Vilay Lakhamphong, Ding kơna Ding jum kơđi čar, Khua ding jum Kông ang dêh čar Lao glăk rai čuă, ngă bruă ƀơi dêh čar Việt Nam. Pơ ala kơ khua mua Ping gah, Kơnuk kơna Việt Nam, Khua mir sir dêh čar ơi Nguyễn Xuân Phúc hơ-ơč hmưi kơ ơi Vilay Lakhamphong hơmâo ruah ngă Ding kơna Ding jum kơđi čar, laih dong jing Khua ding jum kông ang blung a hơmâo pơđĭ grăt Đại tướng Kông ang mơnuih ƀon sang Lao.

Khua mir sir ơi Nguyễn Xuân Phúc tŭ jum Khua ding jum kông ang dêh čar Lao Vilay Lakhamphong.

Khua mir sir čang rơmang Ding jum Kông ang dua bơnah pơtrut tui gru grua, ngă hrŏm kơjăp hloh, dlăm hloh, ƀrô pơsir bruă kiăng ngă yôm rah, ƀrô ngă hrŏm amăng hơdôm bruă kah hăng pơgăn ƀing ngă soh tui glông internet, boh thâo phrâo; pơgăn ƀing ngă soh gah ma tuý. Khua ding jum kông ang dêh čar Lao pơpŭ bơni biă mă tơlơi gum djru prong mơng Ping gah, Kơnuk kơna Việt Nam hăng Ding jum kông ang Việt Nam lêng nao hrŏm djru ba dêh čar Lao, biă ñu amăng hrơi blan tơnap tap.

Siu H’Mai: Pơblang