VOV4.Jarai - Ƀrô djơ̆ tal hơdor glăi 131 thun hrơi tơkeng Khua mir sir Hồ Chí Minh, 110 thun Wa Hồ hyu ĕp jơlan tlaih rơngai lŏn ia (05/6/1911 - 05/6/2021), mơguah 20/5, ƀơi sa dua anih anom gru grua đưm ƀơi tơring glông Hóc Môn, ƀôn prong Hồ Chí Minh, Khua mir sir dêh čar ta ơi Nguyễn Xuân Phúc nao pơpŭ bơnga, tuĭ ñang hơdor kơ Khua mir sir Hồ Chí Minh; pơpŭ bơnga, tuĭ ñang hơdor glăi, thâo tơngia kơ ƀing ling tơhan pơsăn drơi, amăng anun hmâo ơi Nguyễn Văn Cừ, Hà Huy Tập Khua git gai Ping gah hơđăp dêh čar ta. Tơring glông Hóc Môn dưi hmâo đơ đam dêh čar ta thâo hăng bruă tơgŭ hơkrŭ 18 bôh plơi Vườn Trầu amăng thun 1885 hăng Hóc Môn jing anih dưi hmâo Ping gah dêh čar ta ruah ngă hơkrŭ hơgom kiăng pok tơbiă lu bruă jơnum yôm phăn črâo ba bruă ngă hơkrŭ đơ đam dêh čar ta rơnuk 1936-1939. Ƀơi pra yang hơdor glăi Ngã Ba Giồng amăng kual Gru grua đưm gưl lŏn ia Ngã Ba Giồng, Khua mir sir dêh čar ta ơi Nguyễn Xuân Phúc hăng grŭp nao hrom, hmâo pơpŭ bơnga, tuĭ ñang, kuh akô̆ ƀơi anăp bơngač jua Khua mir sir Hồ Chí Minh, pô git gai prong prin mơng djuai ania Việt Nam. Ăt amăng mơguah lơ 20/5 mơn, ƀơi să Tân Thới Thượng, tơring glông Hóc Môn, Khua mir sir dêh čar ta ơi Nguyễn Xuân Phúc hmâo nao čuă, ƀơk gơnam tam kơ sa dua bôh sang anô̆ dô̆ klă hơdip hiam./.

Siu H’ Prăk: Pô pơblang