VOV4.Jarai-Mơguah lơ 7/12, ƀơi sang bruă mir sir, Khua mir sir ơi Nguyễn Xuân Phúc, git gai jơnum Khul pơgang tơlơi rơnuk hăng  pơhlôm hơđong dêh čar jơnum lok sa rơwang bruă thun 2021-2026. Ƀơi mông jơnum, Khul khua mua hơmâo bơkơtuai nao rai, pơgôp hiăp kơ bruă ngă hrom kơplah wah Ding jum ling tơhan, Ding jum kông an, djop ding jum, anom bruă gơnong dlông, djop tơring čar, ƀôn prong  amăng bruă pơhlôm, pơgang klin Covid 19; pơtrut bruă ngă pok pơhai brơi ling tơhan nao djru hrom pơgang tơlơi rơnuk rơnua sang gum hơbit djop dêh čar; bruă mă pơgang tơlơi rơnuk rơnua hăng ngă hrom pơgang hơđong tơlơi pơhing plăng internet ră anai.

 Kơ hơdră mă bruă thun 2022, Khua mir sir, ngă rah Khua khul anai lăi, khom thâo tong ten tơlơi pơhing, prăp lui na nao hơdră bong glăi tơlơi sat truh, tơlơi pơhing amăng kual hăng rŏng lŏn tơnah, Khua mir sir rơkâo ding kơna Khul, djop anom bruă mơ̆ng Khul khom pơđĭ tui tơlơi gơgrong ba bruă mă pơgang tơlơi rơnuk rơnua hăng pơhlôm hơđong dêh čar. Boh nik ñu prăp lui bruă pơgang hlâo, bong glăi tơlơi lông lăng ƀơi anăp mơta hăng sui thun tơdơi anai.

Nao hrom hăng anun kơtưn ngă hrom tong ten pơgang rơnuk rơnua dêh čar hăng ngă tui klă pơtom hiăp, pơtrut pơtom hiăp gah ling tơhan, pơgang lŏn ia tañ hăng lăng hlâo mơ̆ng ataih.

Nay Jek: Pơblang