VOV4.Jarai-Khua mir sir dêh čar ơi Nguyễn Xuân Phúc phrâo hơmâo hră mơ-it kơ Anom bruă mơnuih tơpuôl Việt Nam kơ bruă jak iâu hăng pok pơhai tŭ yua Hơdră “75 rơbâo pơčeh phrâo, găn rơgao tơlơi tơnap, pơđĭ kyar” ƀrô djơ̆ tal 75 thun Hrơi jar kmar mă bruă ƀơi Việt Nam. Hơdră jak iâu amăng mơnuih tơpuôl, mơnuih ngă kông ñơn mut phung, mơnuih apăn bruă kơnuk kơna, mơnuih mă bruă apah amăng anom bruă kơnuk kơna djop gưl, djop anom bruă, wơ̆t amăng sang bruă kơnuk kơna hăng gah rơngiao kơnuk kơna amăng dêh čar ta.

Khua mir sir lăng yôm hơdră “75 rơbâo pơčeh phrâo, găn rơgao tơnap tap, pơđĭ kyar” jing hơdră tŭ yua sit nik yua dah bruă mă pơkra ming jing phun pơjing rai mơnong mơnua, dram gơnam či yua laih anun anŏ pơdrong asah kơ dêh čar. Hơdră djru râo pơdưh pran jua hăng pơtrut bruă mă thâo pơčeh phrâo gru grua thâo thăi amăng anom bruă kơnuk kơna, sang bruă sĭ mơdrô: Rĭm čô mơnuih mă bruă lêng kơ hur har, tong ten mă bruă, pơmin na nao djru hrom bruă pơđĭ kyar lŏn ia ƀơi anih ta dŏ mă bruă.

Khua mir sir pơdah pran jua hăng đăo kơnang kơ Anom bruă mơnuih tơpuôl Việt Nam ăt pơđĭ tui Hơdră “75 rơbâo pơčeh phrâo, găn rơgao tơnap tap, pơđĭ kyar”, ăt hơmâo lu ring bruă hiam klă laih anun ba bơngač dơlăm hloh, djru hrom pơđĭ tui lu tơlơi đăo kơnang, tơlơi kiăng kơtưn đĭ kơ sa boh dêh čar Việt Nam  hing ang, mơak klă.

Nay Jek: Pơblang