VOV4.Jarai-Lơ 21/10, ƀơi anom bruă khua mir sir, Khua mir sir ơi Nguyễn Xuân Phúc hơmâo jao hră pơsit bruă mă kơ khua pơ ala dêh čar ta rơwang bruă thun 2021-2024 pơ kual Mi kô̆ hăng Trung Á kơ 8 čô khua pơ ala. Ƀơi mông tŭ jum jao bruă, pơ ala kơ ƀing khua anih jưh pơ ala či nao mă bruă pơ dêh čar tač rơngiao, ƀing khua mua anih jưh pơ ala kơ Việt Nam pơdah pran jua pơ-ư ang prong yua Ping gah, Kơnuk kơna hăng mơnuih ƀôn sang jao brơi, laih dơ̆ng lăi amra gir run lu hloh, ngă hrom lu sang bruă kơnuk kơna amăng dêh čar hăng pơ dêh čar tač rơngiao, ngă tui djơ̆ jơlan hơdră pơtom hiăp mơ̆ng Ping gah dêh čar ta ruah khua tal XIII.

Pơ ala kơ ping gah, kơnuk kơna, Khua mir sir ơi Nguyễn Xuân Phúc pơpŭ kơ ƀing khua anih jưh pơ ala dưi hơmâo Ping gah, kơnuk kơna đăo kơnang jao bruă prong ƀơi hơdôm dêh čar kual Mi kô̆. Khua mir sir lăi pơtong, anai lĕ tơlơi pơ-ư ang prong hăng  tơlơi gơgrong ăt prong mơ̆n ping gah, kơnuk kơna hăng mơnuih ƀôn sang jao kơ ƀing ngă khua anih jưh pơ ala dêh čar ƀơi dêh čar tač rơngiao.

Anai lĕ tal pơđĭ bruă khua anih jưh pơ ala tal dua tơdơi kơ Jơnum ruah khua ping gah dêh čar tal XIII, Khua mir sir lă pơtong, jơlan hơdră pơtom hiăp mơ̆ng Việt Nam tơdơi kơ ruah khua ping gah ăt kah hăng anăp mă bruă lăng nao truh thun 2045, Việt Nam amra jing lŏn ia pơhrui glăi lu amăng tơlơi bơwih ƀong huă mơnuih mơnam.

Nay Jek: Pơblang