VOV4.Jarai - Mơguah lơ 22/11, ƀơi Sang brưa Khua mir sir, Khua mir sir ơi Nguyễn Xuân Phúc, Khua Khul apăn bruă Ling tơhan hăng Rơnuk rơnua lŏn ia, Khua git gai tơhan blah ngă, brơi hră pơsit pơđĭ grăt hlâo hrơi pơkă, mơng Kơ-iăng khua Đô đốc tơhan ia rơsĭ đĭ ngă Thượng tướng kơ ơi Phạm Hoài Nam, Ding kơna Ping gah kơnuk kơna, Ding kơna Ping gah ling tơhan, Kơ-iăng khua ding jum ling tơhan. Pơhiăp ƀơi mông jao bruă, Khua mir sir ơi Nguyễn Xuân Phúc lăi, Thượng tướng Phạm Hoài Nam lĕ sa čô khua apăn bruă hơmâo tơlơi pơmin kơjăp, tơlơi pơmin hiam; hơmâo pơtô rơguăt bruă, rơgơi mơbruă biă mă; hơmâo pơtŏp, kơjăp bruă mơng gưl anet; hơmâo lu thun ngă bruă git gai wai lăng hơdôm anom bruă tơhan.

Kiăo tui tơlơi jao bruă hơmâo Khua ding jum ling tơhan jao, Khua mir sir kiăng Thượng tướng Phạm Hoài Nam git gai pơđĭ kyar bruă pơkra măi mok gơnam yua gah ling tơhan kiăo tui rơnuk phrâo, dưi pơkra rai phao kơtuang, măi mok kiăng yua kơ tơhan blah ngă, gir djru pơđĭ kyar bruă pơkra măi mok tui rơnuk phrâo, pơplih phrâo lŏn ia. Ăt pơdah na nao pran jua khin pơmin khin  ngă, gơgrong bruă, khin pơplih phrâo, dưi găn rơgao tơlơi tơnap tap, tơlơi lông, khin ngă bruă yua tơlơi klă hiam kơ abih bang.

Siu H’Mai: Pơblang