VOV4.Jarai - Mơguah lơ 18/8, Khua mir sir ơi Nguyễn Xuân Phúc git gai mông mă bruă hăng Khua mua amăng tơring čar kơ bruă jao amăng bơwih ƀong huă - mơnuih mơnam. Đĭ pơhiăp amăng mông mă bruă, Khua mir sir ơi Nguyễn Xuân Phúc lăng yôm Ping gah, gong gai hăng mơnuih ƀon sang tơring čar Bắc Giang lơ̆m ngă tui lu hơdră kiăng pơgang klin khut khăt, tŭ yua, tui djop hơnong pơkă. Yua anun tơdơi kơ 2 blan pơgang abih klin, 36 hrơi laih rơgao Bắc Giang ƀu hơmâo hlơi dong tah ƀă klin. Bruă bơwih ƀong sĭ mơdrô hơmâo hơkrŭ glăi. Anai lĕ tơlơi yôm phăn, pơgôp hrŏm hăng đơ đam dêh čar hăng anai lĕ tơlơi găn rơgao yôm hăng hơdôm tơring čar amăng pơgang klin.

Khua mir sir ơi Nguyễn Xuân Phúc mă bruă hăng khua mua tơring čar Bắc Giang

Sit biă ñu, tơring čar hơmâo pơgăn tŭ yua hŭi klin lar hyu amăng 4 kual sang măi pơprong. Mah glăk pơgang klin, samơ̆ Bắc Giang ăt pơphun hiam klă hrơi plĕ hră ruah Khua pơ ala mơnuih ƀon sang dêh čar hăng Khul pơ ala mơnuih ƀon sang djop gưl. hrŏm hăng anun, tơring čar hơmâo lu boh than dưi ngă amăng bơwih ƀong huă anun lĕ sĭ mơdrô pơ tač rơngiao, pơhrui ngăn drăp. Ƀrô tal anai, pơ ala brơi Khua mua Ping gah, Kơnuk kơna, Khua mir sir dêh čar ơi Nguyễn Xuân Phúc hơmâo jao Miđai mă bruă mrô III brơi Ping gah, gong gai hăng mơnuih ƀon sang tơring čar Bắc Giang hơmâo ngă klă amăng pơgang klin Covid-19.

Siu Đoan: Pơblang