VOV4.Jarai-Mơguah lơ 4/11, Khua mir sir ơi Nguyễn Xuân Phúc nao jơnum hrom hơdor glăi tal 190 thun hrơi akŏ pơdong tơring čar Lạng Sơn hăng jao brơi tơring čar Lạng Sơn, Mi đai Rơngai mrô sa. Pơ ala kơ khua mua Ping gah, Kơnuk kơna, Khua mir sir ơi Nguyễn Xuân Phúc mơ-it hiăp tơña bla, tơlơi khăp hăng bơni hơ-ơč hiam klă hloh kơ Ping gah, gong gai kơnuk kơna, mơnuih ƀôn sang djop djuai ania tơring čar Lạng Sơn.

Khua mir sir ơi Nguyễn Xuân Phúc jao Mi đai Rơngai mrô sa kơ Ping gah, gong gai kơnuk kơna hăng mơnuih ƀôn sang djop

djuai ania Lạng Sơn

Hơdôm boh tơhnal prong prin, hlom bom mơ̆ Ping gah, gong gai kơnuk kơna hăng Mơnuih ƀôn sang djop djuai ania tơring čar Lạng Sơn dưi ngă laih thun blan rơgao lăp bơni biă mă, dưi hơmâo Ping gah hăng Kơnuk kơna čih pioh laih anun lăng yôm, tơlơi čih pioh gru đưm hing ang mơ̆ng Lạng Sơn jai hrơi pơđĭ tui boh tơhnal pơgôp hrom amăng bruă wai pơgang hăng man pơdong lŏn ia, boh nik ñu tơdơi kơ 30 thun pơblih phrâo.

Hrom hăng pơđĭ kyar bơwih ƀong huă, Khua mir sir ăt rơkâo tơring čar Lạng Sơn gleng nao pơđĭ kyar gru grua, mơnuih mơnam, pơgang hơđong tơlơi hơdip mơda bơwih ƀong huă, pơđĭ tui bruă pơtô hăng pơjuăt, boh thâo ia phrâo ia rơgơi, bruă ia jrao, pơđĭ tui anŏ kjăp drơi jăn pran jua tơlơi suaih pral kơ mơnuih ƀôn sang.

Nay Jek: Pơblang