VOV4.Jarai - Tlam lơ 7/12, Khua mir sir ơi Nguyễn Xuân Phúc nao pơhmư̆ hăng git gai Jơnum klah čun Jơlan hơdră djru man pơdong sang dŏ kơ mơnuih hơkrŭ lŏn ia ta đưm, tơhan hơđăp rin, sang anŏ rin ƀơi tơring čar Hà Giang rơwang thun 2019-2021. Tui hăng tơlơi lăi pơthâo mơng tơring čar Hà Giang, thun 2021, hơmâo čơkă mă rơbêh 63 klai 500 klăk prăk mơng hơdôm anom bruă, mơnuih mơnam djru kơ jơlan hơdră anai; hơmâo pok pơhai hăng ngă giong sang dŏ brơi kơ giăm 1.400 boh sang anŏ. Prăk pơƀut glăi mơng anom bruă mơnuih mơnam truh mông anai rơbêh 305 klai 500 klăk prăk laih. Tơdơi kơ pơhmư̆ tơlơi pơgôp hiăp mơng hơdôm ding jum, anom bruă, tơring čar Hà Giang, Khua mir sir ơi Nguyễn Xuân Phúc bơni biă kơ tơring čar, mah anai lĕ tơring čar rin, tơnap tap yua klin Covid-19, wơ̆t hăng tơlơi truh lŏn adai ngă, samơ̆ ăt prăp rơmet, iâu pơthưr arăng djru prăk kăk man pơdong brơi rơbêh 5.100 boh sang. hăng rơbêh 5.000 boh sang ƀu rup dŏ glăi, Khua mir sir kiăng pok pơhai ngă dong amăng hrơi blan pơ anăp kiăng neh met wa plai ƀiă tơnap.

Siu H’Mai: Pơblang