VOV4.Jarai - Tlam lơ 13/12, ƀơi sang bruă Khua mir sir, Khua mir sir ơi Nguyễn Xuân Phúc tŭ jum 60 čô khua pơ ala kơ ƀing khua mua glăi Jơnum đah kơmơi khul ling tơhan tal 7 phrâo pơđut hiam laih ƀơi Hà Nội. Pơhiăp ƀơi mông bưp, Khua mir sir bơni kơ ƀing đah kơmơi amăng khul ling tơhan lêng gir găn rơgao tơnap tap, dưi ngă truh kih djŏp bruă hơmâo jao, laih dong ngă klă tơlơi yang pơjing kơ ƀing đah kơmơi lĕ wai lăng sang anŏ. Đah kơmơi amăng khul ling tơhan sit jing đah kơmơi rơgơi bruă čar, apăn bruă sang. Hăng rơbêh 90 rơbâo čô khua, ding kơna hăng rơbêh 2.000 khul grup, đah kơmơi ngă tơhan glăk hơmâo ƀơi djŏp anih ngă bruă, amăng djŏp bruă mă, dŏ wai lăng ƀưi djŏp anih amăng dêh čar. Mah dŏ pơpă tŭ mơn, ngă bruă hơget tŭ mơn, Đah kơmơi amăng khul ling tơhan lêng pơtrut đĭ pran jua hiam mơng tơhan Wa Hồ. Biă ñu, rơwang thun 2016-2021 tal blung a hơmâo 41 čô đah kơmơi ngă khua, ngă ding kơna amăng Khul tơhan hơmâo gum djă bong tơlơi rơngai mơng Sang gum hơbit djŏp dêh čar. Amăng bruă pơgang klin Covid-19, hơmâo 1.700 čô kơsung nao hlâo gum djru kơ anih hơmâo klin.

Siu H’Mai: Pơblang