VOV4.Jarai-Blan bơrơmi ria lĕ mông pioh kơ čơđai muai, mơak ngui ngor hăng ơi yă amĭ ama, ƀong huă, mơñum ia mơak hrom lăng blan bơrơmi ria tơ-ua bơbung sang akŏ bơyan puih. Samơ̆, hơdôm tơring čar amăng dêh čar ta thun anai, ƀing ană amôn čơđai muai čơkă blan Bơrơmi ria amăng anih dŏ pơčlah mơnuih mơnam ƀudah pơčlah amăng sang anŏ pioh pơgang Covid 19.

Khua mir sir ơi Nguyễn Xuân Phúc hăng ƀing ană amôn čơđai sang hră

Ƀrô djơ̆ tal ngui ngor mơak Blan bơrơmi ria anai, Khua mir sir ơi Nguyễn Xuân Phúc mơ-it hră truh pơ ƀing ană amôn čơđai muai, amăng hră mơ-it čih tui anai: Wa ol kơdol pran jua lơ̆m ƀuh lu ană amôn čơđai muai anet jing hĭ kah hăng ling tơhan mơ̆ng muai khin hơtai, akŏ pơjing mă tơlơi dŏ dong ƀong huă amăng mông dŏ ataih mơ̆ng sang anŏ, amĭ ama, yua sang anŏ dŏ pơčlah phara bru bra klin kheng ngă.

Wa ăt mơak hrom laih anun bơni biă kơ ƀing ană amôn thâo găn rơgao hĭ tơlơi tơnap tap, hrăm hră thâo, săng, gưt hiăp amĭ ama. Ană amôn ăt khom gir run pran jua khăp kơ lŏn ia, pơ-ư ang kiăng hrăm, ƀư̆ pran jua, tơlơi pơmin kiăng thâo, rơgơi pơgôp pran jua akŏ pơdong lŏn ia ta jai hrơi hiam mơak, pơdrong asah kah hăng Wa Hồ khăp ƀu eng ƀing ta čang rơmang ƀơi tơdăm ngek dra muai, čơđai muai Việt Nam.

Nay Jek: Pơblang