VOV4.Jarai - Tlam lơ 15/11, amăng hrơi nao mă bruă ƀơi ƀon prong Hồ Chí Minh, Khua mir sir ơi Nguyễn Xuân Phúc nao čuă, brơi gơnam pơpŭ kơ ƀing nai pơtô rơgơi mơbruă bơi ƀon prong Hồ Chí Minh, hơ-ơč pơpŭ kơ ƀing nai ƀrô hrơi ngă lơphet Pioh kơ ƀing nai pơtô Việt Nam lơ 20/11. Khua mir sir hơmâo nao čuă, brơi gơnam kơ Thạc sĩ Triệu Thị Huệ, Khua grup hơđăp Grup Ngữ Văn, Sang hră gưl 3 chuyên Lê Hồng Phong, lu wơ̆t laih mă hră bơni kơ Khua Jơnum min mơnuih ƀon sang ƀon prong hăng amăng anom bruă pơtô hrăm. Khua mir sir ơi Nguyễn Xuân Phúc pơpŭ bơni biă mă kơ nai pơtô Triệu Thị Huệ abih pran jua pơtô, pơjing ană mơnuih.

Tŏ tui, Khua mir sir Nguyễn Xuân Phúc hơmâo nao čuă, hơ-ơč hmưi kơ Kơ-iăng nai tha prin, nai prin tha Lý Hòa, Tơhan sông kơtang Mă bruă. Tơlơi ră ruai mơng Kơ-iăng nai tha prin, nai prin tha Lý Hoà - sa čô nai pơtô rơgơi, kiăng pơpŭ biă mă, gru rơđah bơngač kơ pran jua gir kơtir, hrưn đĭ mơng sa čô tơhan laih anun tơlơi gir run hor kơ bruă mơng sa čô mơnuih rơgơi kơsem min boh thâo ngă pơhưč lu rơnuk čơđai hla tui.

Khua mir sir hơ-ơč kơ Kơ-iăng nai tha prin, nai prin tha Lý Hòa, tơhan sông kơtang Mă bruă rơnuk phrâo.

Siu H’Mai: Pơblang