VOV4.Jarai-Mơguah lơ 2/11, ƀơi tơring čar Ninh Bình, Khua mir sir ơi Nguyễn Xuân Phúc nao čuă hơdôm boh anom ngă ƀong hrom pơkra ming hăng sĭ mơdrô bơwih bơwăng tŭ yua, ngă gêh găl pơsir bruă mă kơ lu mơnuih amăng plơi pla, amăng anun, anom ngă ƀong hrom pơkra ming, sĭ mơdrô gơnam hăng lŏn khur Bồ Bát, tơring glông Yên Mô hăng anom ngă ƀong hrom Sinh Dược tơring glông Gia Viễn.

Khua mir sir ơi Nguyễn Xuân Phúc lăng yôm djop mơta gơnam pơkra ming mơ̆ng Anom ngă ƀong hrom Sinh Dược

Ƀrô djơ̆ tal anai, Khua mir sir ơi Nguyễn Xuân Phúc pơtrun hiăp kơ khua mua tơring čar Ninh Bình, hơdôm tơring glông Gia Viễn, Yên Mô, Khul pơlir hơbit ngă ƀong hrom Việt Nam hăng tơring čar Ninh Bình, ngă gêh găl brơi kơ djop anom bruă ngă ƀong hrom pơđĭ kyar, pơsir bruă mă, djru pơtrut bơwih ƀong huă amăng tơring čar. Amăng anun kiăng đing nao djru prăk čan, anih pơdong sang bruă, bruă pơtô hrăm bruă mă, lăi pơthâo hăng pôr pơhưč gơnam sĭ mơdrô, boh nik ñu gơnam sĭ mơdrô pơkra ming thâo pơčeh phrâo, dưi hơmâo lu mơnuih hor blơi kah hăng anom ngă ƀong hrom Sinh Dược hăng Bồ Bát pơjing rai.

Hrom hăng anun, djru kơ djop sang bruă ngă ƀong hrom pơđĭ kyar pơkra ming tui rơnoh sĭ mơdrô, ba yua boh thâo ia rơgơi pơkra pơjing gơnam sĭ mơdrô tŭ yua, ƀu kơnong djop gơnam sĭ mơdrô kơ anih anom 100 klăk čô mơnuih Việt Nam đôč ôh, dŏ ba sĭ mơdrô pơ dêh čar tač rơngiao dơ̆ng.

Siu Đoan: Pơblang