VOV4.Jarai-Ăt amăng tal nao čuă jơmư sit nik dêh čar Lao, ơi Nguyễn Xuân Phúc Khua mir sir hăng bơnai ñu nao čuă, tơña bla, ră ruai hăng ƀing khua mua, mơnuih mă bruă amăng sang bruă Khua anih jưh pơ ala Việt Nam ƀơi dêh čar Lao laih anun ƀing pơ ala kơ mơnuih ƀôn sang Việt Nam, ƀing ngă bruă sĭ mơdrô, čơđai sang hră Việt Nam dŏ mă bruă, sĭ mơdrô, hrăm hră ƀơi dêh čar Lao.

Khua mir sir ơi Nguyễn Xuân Phúc lăi pơtong, tal nao čuă anai tŭ yua biă mă, anai lĕ yua hơmâo tơlơi pơgôp prong mơ̆ng ƀing khua mua anih jưh pơ ala, hrom hăng mơnuih ƀôn sang Việt Nam hlăk dŏ hơdip mơda, mă bruă ƀơi dêh čar Lao.

Khua mir sir lăi pơtong, 100 rơbâo čô mơnuih ƀôn sang Việt Nam dŏ ƀơi dêh čar Lao lêng kơ čăng glăi pơ dêh čar ta pô soh, laih anun djru ba lu biă mă kơ mơnuih ƀôn sang amăng dêh čar lơ̆m bưp tơlơi tơnap tap truh lŏn adai ngă hăng klin kheng Covid 19.

Hăng pran jua bruă ngă tui anun, Khua mir sir ơi Nguyễn Xuân Phúc čang rơmang mơnuih ƀôn sang ta dŏ ƀơi dêh čar Lao ăt djă pioh gru grua djuai ania, ngă hiư̆m pă kiăng rĭm čô mơnuih Việt Nam dŏ hơdip mơda hăng mă bruă ƀơi dêh čar Lao kah hăng sa gru bơngač, lăp pơ anăn jing mơnuih dêh čar Việt Nam.

Nay Jek: Pơblang