VOV4.Jarai - Ƀrô blan ngă bruă yua kơ mơnuih thun tha Việt Nam thun 2021 (blan 10), tlam lơ 27/10, Khua mir sir ơi Nguyễn Xuân Phúc nao čuă hăng mă bruă ƀơi sa, dua anom bơwih ƀong sĭ mơdrô ba gru yua ƀing tha rơma wai lăng ƀơi Hưng Yên hăng Hà Nội, kiăng kơ pơpŭ bơni, pơtrut pơsur ƀing mơnuih ba gru lĕ ƀing tha rơma ngă khua apăn akŏ, wai lăng anom bơwih ƀong sĭ mơdrô.

Tơdơi kơ nao čuă hơdôm anom bruă, Khua mir sir ơi Nguyễn Xuân Phúc hơmâo mông mă bruă hăng khua mua ƀôn prong Hà Nội hăng ƀing mơnuih ba gru lĕ ƀing tha rơma ngă khua anom bơwih ƀong sĭ mơdrô. Đĭ pơhiăp amăng mông mă bruă, Khua mir sir ơi Nguyễn Xuân Phúc lăng yôm bruă ƀôn prong Hà Nội hơmâo ngă klă amăng bruă pơgang klin Covid-19, truh ră anai mrô mơnuih tlâ̆o 1 ară rơbêh 95%, 2 ară lĕ rơbêh 57%, laih dong ngă klă amăng bruă djru brơi mơnuih ƀon sang, anom bơwih ƀong sĭ mơdrô bơbeč nao kơtang mơng klin Covid-19. Hrŏm hăng anun ngă klă tui hơdră djru mơnuih mơnam, amăng anun đing nao ƀing tha rơma, djru brơi prăk kak hăng bơwih brơi tơlơi suaih pral hăng rơnoh prăk rơbêh 734 klai prăk amăng sa thun.

Siu Đoan: Pơblang