VOV4.Jarai - Mơguah lơ 25/10, ƀơi Hà Nội, Khua mir sir ơi Nguyễn Xuân Phúc hơmâo ngă lơphet tal hơdor glăi 75 thun hrơi gru grua Sang hră pơtô ling tơhan, hăng jao miđai mă bruă mrô I hăng pơphun mut sang hră thun 2021-2022. Pơ ala brơi khua mua Ping gah, Kơnuk kơna, Khua mir sir ơi Nguyễn Xuân Phúc hơmâo jao miđai mă bruă mrô I brơi kơ Sang pơtô ling tơhan hăng atông hơgor pơphun mut sang hră. Amăng mông ngă lơphet, Khua mir sir rơkâo Sang hră pơtô ling tơhan kiăng kơ pơplih tơlơi pơmĭn hăng bruă mă kiăng pơjing Sang hră dưi mă bruă lăp djơ̆ hăng tơlơi jao, tŏ tui pơgiong bruă jao amăng pơtô hrăm, pơgôp wai pơgang lŏn ia ta, hơđong amăng mơnuih mơnam; tŏ tui pơplih phrâo amăng djop mơta amăng pơtô hrăm, akŏ phun amăng pơplih, hrưn đĭ kơtang amăng bruă mă, ba glăi boh than amăng pơtô hrăm brơi mơnuih apăn bruă thâo rơgơi, djơ̆ hăng tơlơi kiăng amăng pơjing tơhan kông ang ngă hơkrŭ, mă bruă thâo rơgơi, djru pơgiong bruă jao amăng wai pơgang rơnuk rơnua lŏn ia amăng rơnuk phrâo.

Siu Đoan: Pơblang