VOV4.Jarai - Mơguah lơ 20/12, ƀơi Hà Nội, Ping gah Khul ling tơhan dêh čar ta, Ding jum Khul ling tơhan pơphun jơnum Ping gah abih bang ling tơhan lăng nao rai mơng ataih thun 2021 ƀơi 141 anih anom tô nao rai, pơsit bôh tơhnal git gai, črâo ba ngă tui bruă jao khul ling tơhan, pơgang lŏn ia thun 2021 hăng pok pơhai bruă mă thun 2022.

Pơhiăp amăng mông jơnum, pơ ala kơ khua git gai Ping gah, Kơnuk kơna, Ping gah khul ling tơhan dêh čar ta, Khua mir sir dêh čar ta ơi Nguyễn Xuân Phúc mơ-ĭt kơ ƀing khua ling tơhan, mơnuih apăn bruă tơhan, ling tơhan, khul pơhlôm hlâo pơsur, tơhan plơi wai lăng mă pô đơ đam dêh čar tơlơi tơña bla hăng hơ-ư̆č hmưi klă hiam hloh ƀrô djơ̆ tal hơdor glăi 77 thun hrơi pơdŏng Khul ling tơhan mơnuih ƀôn sang Việt Nam. Gah bruă mă thun 2022, Khua mir sir dêh čar ta rơkâo; Ping gah khul ling tơhan, Ding jum khul ling tơhan khom kơsem min, pơsit djơ̆ tơlơi; gơgrong hlâo hloh amăng pơkă lăng hlâo, pơphô brơi bruă mă kơ ling tơhan, pơgang lŏn ia hăng Ping gah, Kơnuk kơna; ƀu pioh dô̆ tơguan, truh kah mơng pơgang. Pơkĕ kơjăp hrom pơgang lŏn ia, rơnuk rơnua plơi pla, pơtom hiăp, kơtưn gum hrom jar kơmar pơgang lŏn ia./.

Siu H’ Prăk: Pơblang