VOV4.Jarai - Ăt amăng tlam lơ 21/12, amăng tal nao čuă gưl Kơnuk kơna hăng Dêh čar Kur, Khua mir sir dêh čar ta ơi Nguyễn Xuân Phúc hơmâo mông bưp Khua git gai pơ ala mơnuih ƀon sang dêh čar Kur Heng Samrin. Ƀơi mông jơnum, Dua čô khua lăi Việt Nam hăng Kur jing dua boh dêh čar jê̆ giăm, hơmâo gru grua gum pơgôp mơng đưm hlâo laih, dong yua nao rai amăng djŏp bruă, jing tơlơi pơ-ư pơ-ang, jing gơnam yôm ƀu dưi blơi ôh mơng dua djuai ania mơ̆ rơnuk tơdơi anai kiăng djă lui, pơtrut tui dong.

Dua bơnah tŭ ư hrŏm amăng hrơi blan pơ anăp amra pơphun na nao bruă pơbưp, bơkơtuai khua mua djŏp gưl; bơlăi nao tơlơi thâo rơgơi ngă bruă, pơphun jơnum pơbưp khua git gai pơ ala mơnuih ƀon sang, grup khua pơ ala mơnuih ƀon sang ngă giăng mah, grup ƀing đah kơmơi ngă khua pơ ala mơnuih ƀon sang, grup khua git gai pơ ala mơnuih ƀon sang thun hlăk ai; pơtrut tui tơlơi gơgrong bruă mơng ƀirô khua git gai pơ ala mơnuih ƀon sang dua bơnah amăng bruă pơtrut tui tơlơi rô nao rai dua bơnah; ngă hrŏm kơjăp, djru nao rai tơdruă amăng djŏp mông jơnum măng kual wơ̆t hăng jar kmar kah hăng AIPA, Khul pơlir hơbit khua git gai pơ ala mơnuih ƀon sang rŏng lŏn tơnah, Jơnum Khua git gai pơ ala mơnuih ƀon sang kual ASIA - Thái Bình Dương.

Siu H’Mai: Pơblang