VOV4.Jarai - Amăng hơdôm hrơi nao jơnum Khul ding kơna Sang gum hơbit djop dêh čar tal 76, lơ 21/9 Khua mir sir ơi Nguyễn Xuân Phúc hơmâo mông bưp yôm phăn hăng ơi Adullah Sahib, Khua khul ding kơna, hăng ơi Antonio Guterres, Khua čih pioh sang gum hơbit djop dêh čar. Amăng mông bưp, Khua mir sir ơi Nguyễn Xuân Phúc pơsit Việt Nam lêng kơ lăng yôm hăng dong yua Sang gum hơbit djop dêh čar lĕ anom bruă akŏ phun amăng wai lăng rŏng lŏn tơnah kiăng kơ pơgăn hĭ hơdôm tơlơi lông prong prin ră anai hăng čang rơmang amra pơtrut kơtang ngă hrŏm djop mơta hăng Sang gum hơbit djop dêh čar. Khua mir sir brơi thâo Việt Nam glăk gir run amăng bruă pơgang klin Covid-19 glăk ngă tơnap tap, lăng tơlơi rơnuk rơnua, tơlơi suaih pral kơ mơnuih ƀon sang lĕ yôm hloh, laih dong bơni Jơlan hơdră COVAX hăng hơdôm khul grup mơng Sang gum hơbit djop dêh čar hơmâo djru brơi vaccine, gơnam măi mok gah ia jrao hăng črâo ba amăng bruă pơgang klin hăng hơkrŭ glăi bơwih ƀong huă tơdơi kơ pơgang hĭ klin, rơkâo Sang gum hơbit djop dêh čar tŏ tui djru brơi Việt Nam pơ anăp anai, biă mă ñu lĕ djru pok pơhai bruă tlâ̆o vaccine brơi abih bang mơnuih ƀon sang.

Siu Đoan: Pơblang