VOV4.Jarai - Tŏ tui jơlan hơdră ngă bruă ƀơi New York, dêh čar Mi, lơ 22/9 tui mông ƀơi dêh čar anai, Khua mir sir ơi Nguyễn Xuân Phúc hơmâo mông bưp hăng Khua mir sir dêh čar Mông Cổ, Thụy Sĩ, Áo hăng Khua khul pơlir hơbit kual Mi Kô̆ (EU). Ƀơi mông bưp hăng Khua mir sir dêh čar Mông Cổ, Khua mir sir ơi Nguyễn Xuân Phúc pơsit lăng yôm biă tơlơi rô nao rai ngă giăng mah mơng dua bơnah, tơlơi dong yua, djru nao rai tơdruă akŏ pơjing lŏn ia. Ƀơi mông tŭ jum Khua mir sir Thụy Sỹ Guy Parmelin, dua čô khua git gai lăi amra ngă hrŏm amăng bruă sĭ mơdrô, pơtrut tui bruă ngă hrŏm pơđĭ kyar amăng rơwang thun 2021-2024 hăng prăk ODA 80 klăk dolar Mi mơ̆ Thụy Sỹ ƀuăn hlâo. Dua čô khua tŭ ư kiăng ĕp hơdră pơsir hĭ tơlơi tơnap tap amăng bruă sĭ mơdrô bơbeč yua klin Covid-19 ngă, amăng anun kiăng tañ kĭ hră FTA kơplah wah Việt Nam hăng Khul wai lăng bruă sĭ mơdrô rơngai kual Mi Kô̆ (EFTA). Ƀơi mông bưp Khua mir sir dêh čar Áo, Khua mir sir ơi Nguyễn Xuân Phúc rơkâo kiăng dêh čar Áo djru brơi kơ Việt Nam amăng bruă jao brơi boh thâo măi mok pơkra gơnam; sem lăng djru brơi măi mok gơnam yua gah ia jrao đah mơng djru Việt Nam tañ dưi pơgang klin.

Siu H’Mai: Pơblang